ជីវិត​ដំណឹង​ល្អ​របស់ព្រះគ្រីស្ទអាន់សាំងហុង

[ជីវិត​ដំណឹង​ល្អ​របស់ព្រះគ្រីស្ទអាន់សាំងហុង]

ព្រះគ្រីស្ទលើកទី២ ព្រះអាន់សាំងហុង បានទទួលបុណ្យជ្រមុជទឹកនៅព្រះជន្ម៣០ឆ្នាំ ក្នុងឆ្នាំ១៩៤៨ ហើយបានចាប់ផ្តើមជីវិតនៃដំណឹងល្អរបស់ទ្រង់ ដើម្បីបំភ្លឺពន្លឺនៃសេចក្តីពិត តាមទំនាយស្តេចដាវីឌ។ ទ្រង់បានយាងមកផែនដីនេះជាមនុស្ស ដើម្បីជួយសង្គ្រោះមនុស្សជាតិ ហើយបានរស់នៅក្នុងជីវិតដែលពេញដោយការឈឺចាប់ និងការរងទុក្ខ មិនមែនដោយសិរីល្អ និងកិត្តិនាមឡើយ។

ដូចដែលទ្រង់បានប្រសូត នៅឆ្នាំ១៩១៨ ទ្រង់ត្រូវឆ្លងកាត់ជំនាន់នៃការកេងប្រវ័ញ្ច និងការគាបសង្កត់ ក្នុងអំឡុងពេលអាណានិគមជប៉ុន។ ពេលព្រះអាន់សាំងហុងចាប់ផ្តើមកិច្ចការរដ្ឋបាលរបស់ទ្រង់ ប្រទេសកូរ៉េបានស្ថិតក្នុងស្ថានភាពដ៏លំបាក និងបំផ្លិចបំផ្លាញខាងវិញ្ញាណ។ ខាងសាច់ឈាម ប្រទេសនេះក៏ស្ថិតក្នុងស្ថានភាពក្រីក្រផងដែរ។ នៅពេលនោះ កូរ៉េដែលទើបតែរំដោះចេញពីចក្រពត្តិនិយមជប៉ុន បានធ្លាក់ចុះទៅជាប្រទេសក្រីក្របំផុតក្នុងពិភពលោក បន្ទាប់ពីសង្គ្រាមកូរ៉េបានផ្ទុះឡើងនៅឆ្នាំ១៩៥០ ហើយប្រជាជនទាំងអស់ត្រូវឆ្លងកាត់ការលំបាកក្នុងជីវិតយ៉ាងធ្ងន់ធ្ងរ។

[សញ្ញាថ្មីដែលបានតាំងឡើង ដោយសេចក្តីស្រលាញ់ និងការបូជា]

ដូចជាព្រះយេស៊ូវគ្រីស្ទ កាលពី២០០០ឆ្នាំមុន ព្រះអាន់សាំងហុងបានរក្សាច្បាប់នៃជីវិត ហើយផ្សព្វផ្សាយដំណឹងល្អ ដោយធ្វើការងារលំបាកទាំងអស់ ទោះទ្រង់ត្រូវគេមើលងាយ និងត្រូវអាប់ឱនក៏ដោយ។

នៅជំនាន់នោះ ដែលមនុស្សជាច្រើនពិបាកក្នុងការប្រកបរបរចិញ្ចឹមជីវិត ហើយស្រេកឃ្លាន ព្រះអាន់សាំងហុង ត្រូវធ្វើការជាកម្មករថ្ម ដែលមនុស្សគេចចេញ ដើម្បីទុកជាតម្រាប់នៃការរក្សាបញ្ញត្តិរបស់ព្រះ រួមទាំងថ្ងៃឈប់សម្រាកផងដែរ។ ការងារដ៏លំបាកនេះ ​បាន​ធ្វើ​ឱ្យ​នៅ​ពីក្រោយក​របស់​ទ្រង់​ មានស្បែកក្រិនប៉ុន​ក្តាប់ដៃ​។ ទ្រង់បាន​ប្រើ​កម្រៃដែល​រក​បាន​ដោយ​ការ​ងារដ៏លំបាក​នោះ ​សម្រាប់​ចំណាយ​លើ​ការ​ផ្សព្វផ្សាយ និង​សម្រាប់​សរសេរ​សៀវភៅ ​ដែល​នឹង​បើកសម្តែងសេចក្ដី​ពិត​នៃជីវិត។ ដូច្នេះ ទ្រង់​តែង​តែ​ចម្អែតភាពស្រេក​ឃ្លាន​របស់​ទ្រង់ ដោយ​បបរ​ស ឬ​មិនបានសោយអាហារសោះ។ បន្ទាប់ពីការងារដ៏នឿយហត់បែបនេះហើយ ទ្រង់បានចែងទុកសៀវភៅសម្រាប់សេចក្ដីសង្គ្រោះរបស់មនុស្សជាតិ ពេញមួយយប់ ហើយបានស្ដារសេចក្តីពិតសញ្ញាថ្មី ដោយការតមអាហារ និងការបូជារាប់មិនអស់។

ព្រះអាន់សាំងហុង បានទាយអំពីការសុគតរបស់ទ្រង់ជាមុន តាមរយៈប្រព័ន្ធផ្សព្វផ្សាយ នៅ៤ឆ្នាំមុនដែលទ្រង់បញ្ចប់ឆាកជីវិតជាមនុស្សនៅផែនដីនេះ ហើយប្រគល់ព្រះវិហារដល់ពួកសិស្សរបស់ទ្រង់។ សមាគមផ្សព្វផ្សាយពិភពលោក ពួកជំនុំនៃព្រះ រក្សាសេចក្តីពិតសញ្ញាថ្មី ហើយផ្សព្វផ្សាយដំណឹងនៃសេចក្ដីសង្គ្រោះ ដល់មនុស្ស ៧.៨ពាន់លាននាក់ ជុំវិញពិភពលោក ដោយធ្វើតាមតម្រាប់របស់ព្រះអាន់សាំងហុង។