ພະຄຳພີເປັນ ປຶ້ມແຫ່ງຄໍາທໍານວາຍ

ບາງຄົນຖືວ່າ ພະຄຳພີເປັນພຽງແຕ່ປຶ້ມປະຫວັດສາດ ຫຼື ເທບນິຍາຍຂອງອິດສະລາເອນເທົ່ານັ້ນ. ແຕ່ພະຄໍາພີເປັນປຶ້ມທີ່ເກົ່າແກ່ທີ່ສຸດໃນໂລກ, ໄດ້ຖືກບັນທຶກ ໂດຍໃຊ້ເວລາຫຼາຍກວ່າ 1,600 ປີ ໃນສະໄໝທີ່ແຕກຕ່າງກັນ ໂດຍຫຼາຍສິບຄົນທີ່ມີອາຊີບ ແລະ ອາຍຸທີ່ແຕກຕ່າງກັນ. ສິ່ງທີ່ໜ້າປະຫຼາດໃຈຫຼາຍກວ່ານັ້ນແມ່ນ ທຸກໆສິ່ງທີ່ຖືກບັນທຶກໄວ້ໃນໄລຍະເວລາຫຼາຍກວ່າ 1,600 ປີນັ້ນ ໄດ້ເຊື່ອມໂຍງກັນເປັນຄໍາທໍານວາຍ ແລະ ການສຳເລັດເປັນຈິງ.

ໃນທ່າມກາງການບັນທຶກໃນພະຄຳພີນັ້ນ, ຂໍໃຫ້ມາສຶກສາຄໍາທໍານວາຍກ່ຽວກັບກະສັດໄຊລັດ ແລະ ການສຳເລັດເປັນຈິງ. ກະສັດໄຊລັດ ເປັນຜູ້ສ້າງຕັ້ງຈັກກະພົບເປີເຊຍ ແລະ ເປັນຜູ້ປົກຄອງປະເທດທາງທິດບົວລະພາ. ຂໍໃຫ້ມາເບິ່ງຄວາມສຳເລັດອັນຍິ່ງໃຫຍ່ຂອງເພິ່ນ ເຊິ່ງຖືກບັນທຶກໄວ້ໃນພະຄຳພີ.

“ຕໍ່ໄປນີ້ແມ່ນຄໍາສັ່ງຂອງກະສັດໄຊລັດ ຈັກກະພັດແຫ່ງເປີເຊຍ: “ພະຜູ້ເປັນເຈົ້າ ພະເຈົ້າແຫ່ງສະຫວັນຊັ້ນຟ້າ ໄດ້ໃຫ້ຂ້າພະເຈົ້າປົກຄອງທົ່ວທັງໂລກນີ້ ແລະ ໃຫ້ຂ້າພະເຈົ້າຮັບຜິດຊອບສ້າງວິຫານຫຼັງໜຶ່ງຂຶ້ນໃຫ້ພະອົງ ທີ່ກຸງເຢລູຊາເລັມໃນຢູດາ.” ອສລ 1:2-3

ເປັນຫຍັງໄຊລັດ ຈັກກະພັດແຫ່ງເປີເຊຍ ຈຶ່ງສັນລະເສີນພະເຈົ້າຂອງຊາດອິດສະລາເອນ ແລະ ປົດປ່ອຍຊາວອິດສະລາເອນໃຫ້ເປັນອິດສະຫຼະ? ກະສັດ ໄຊລັດ ໄດ້ເຫັນຊື່ຂອງເພິ່ນຖືກບັນທຶກໄວ້ໃນປຶ້ມ ເອຊາຢາ ເຊິ່ງໄດ້ຖືກບັນທຶກໄວ້ປະມານ 170 ປີ ກ່ອນທີ່ເພິ່ນຈະປົດປ່ອຍຊາວອິດສະລາເອນໃຫ້ເປັນອິດສະຫຼະ.

“ພະຜູ້ເປັນເຈົ້າໄດ້ເລືອກໄຊລັດໃຫ້ເປັນກະສັດ! ພະອົງໄດ້ຕັ້ງເພິ່ນໃຫ້ມີໄຊເໜືອບັນດາຊົນຊາດ;... “ເຮົາຈະມອບຂຸມຊັບຈາກທີ່ມືດລັບລີ້ທັງຫຼາຍໃຫ້ເຈົ້າເປັນຜູ້ຄຸ້ມຄອງຊັບສົມບັດເຫຼົ່ານັ້ນ; ແລ້ວເຈົ້າກໍຈະຮູ້ວ່າ ເຮົາຄືພະຜູ້ເປັນເຈົ້າເດີ! ພະເຈົ້າຊາດອິດສະລາເອນໄດ້ເອີ້ນເອົາເຈົ້າ.” ອຊຢ 45:1-3

ກະສັດໄຊລັດ ໄດ້ປະຈັກວ່າ ພະເຈົ້າໄດ້ຊົງຊ່ວຍເພິ່ນໃຫ້ເອົາຊະນະບາບີໂລນ ແລະ ເພິ່ນກໍໄດ້ປົດປ່ອຍຊາວອິດສະລາເອນ ໃຫ້ເປັນອິດສະຫຼະ ຕາມຄໍາທໍານວາຍໃນພະຄໍາພີ. ເປັນຜົນໃຫ້ກະສັດໄຊລັດ ໄດ້ຮັບການຍ້ອງຍໍຈາກຜູ້ຄົນວ່າ ເປັນກະສັດບູຮານ ທີ່ໄດ້ປົດປ່ອຍຂ້າທາດໃຫ້ເປັນອິດສະຫຼະ ແລະ ຍອມຮັບສິດເສລີພາບໃນການນັບຖືສາສະໜາ. ພະຄຳພີຍັງບອກລ່ວງໜ້າເຖິງການປະສູດຂອງເດັກນ້ອຍຜູ້ໜຶ່ງຄືພະເຢຊູ ປະມານ 700 ປີ ກ່ອນທີ່ພະອົງຈະສະເດັດມາຍັງໂລກນີ້.

“... ‘ຍິງສາວຜູ້ໜຶ່ງຈະຖືພາ ແລະ ຈະອອກລູກເປັນຜູ້ຊາຍ ແລະ ຈະມີຊື່ວ່າ ‘ເອມານູເອນ’.” ອຊຢ 7:14

ອີງຕາມຄໍາທໍານວາຍນີ້, ພະເຈົ້າໄດ້ຊົງປະສູດເປັນພະເຢຊູ ໂດຍຜ່ານຮ່າງກາຍຂອງມາລີ ຍິງພົມມະຈາລີ (ມທ 1:18-23). ຍິ່ງໄປກວ່ານັ້ນ, ພະຄຳພີໄດ້ທຳນວາຍຢ່າງລະອຽດວ່າ ພະເຢຊູຈະຊົງທົນທຸກຢ່າງໃດ.

“... ພວກເຮົາດູໝິ່ນປະໝາດ ແລະ ປະຖິ້ມທ່ານໄປ... “ແຕ່ທ່ານທົນຕໍ່ຄວາມທຸກທີ່ເປັນຂອງພວກເຮົາ ຄວາມເຈັບປວດທີ່ໝູ່ເຮົາສົມຄວນໄດ້ຮັບ. ຄວາມລໍາບາກທີ່ທ່ານຮັບເອົານັ້ນ ພວກເຮົາຄິດຢູ່ສະເໝີວ່າ ຄືການລົງໂທດມາຈາກພະເຈົ້າ.” ອຊຢ 53:3-5

ອີງຕາມຄໍາທໍານວາຍນີ້, ພະເຢຊູໄດ້ຊົງຖືກແທງດ້ວຍຫອກ ແລະ ຖືກຂ້ຽນຕີ (ມທ 27:26-35; ຢຮ 19:34). ເຖິງແມ່ນວ່າ ຜູ້ທີ່ບັນທຶກບໍ່ໄດ້ເຂົ້າໃຈໃນຄຳທໍານວາຍຂອງພະຄຳພີ ໃນເວລາທີ່ພວກເຂົາບັນທຶກ, ແຕ່ທັງໝົດກໍໄດ້ສຳເລັດເປັນຈິງ.

ດັ່ງນັ້ນ, ພະຄໍາພີຈຶ່ງໄດ້ເຕືອນພວກເຮົາວ່າ ຢ່າປະໝາດຖ້ອຍຄໍາທີ່ໄດ້ຮັບການດົນໃຈ (1 ທຊ 5: 20). ນັ້ນກໍຍ້ອນວ່າ ຖ້າປະໝາດຄໍາທຳນວາຍຂອງພະຄຳພີ ພວກເຮົາຈະບໍ່ໄດ້ຮັບຄວາມພົ້ນ. ດັ່ງທີ່ຄຳທໍານວາຍຢ່າງຫຼວງຫຼາຍໄດ້ສໍາເລັດ ຕາມທີ່ໄດ້ບັນທຶກໄວ້. ຄຳທໍານວາຍທີ່ຍັງເຫຼືອຢູ່ທັງໝົດກໍຈະກາຍເປັນຈິງ ໂດຍບໍ່ຜິດພາດ.

“ແຜ່ນດິນໄຫວອັນໃຫຍ່ ແລະ ການອຶດຢາກພ້ອມທັງໂລກລະບາດ ຈະເກີດຂຶ້ນໃນທຸກແຫ່ງຫົນ; ຈະເກີດມີສິ່ງແປກປະຫຼາດ ກັບສິ່ງໜ້າຢ້ານທີ່ສຸດຈາກທ້ອງຟ້າ.” ລກ 21:11

ພະຄຳພີບອກພວກເຮົາວ່າ ພວກເຮົາຕ້ອງແລ່ນໜີໄປທີ່ສີໂອນ ເພື່ອທີ່ຈະໄດ້ຮັບຄວາມພົ້ນ ເມື່ອໄພພິບັດ ແລະ ການທໍາລາຍອັນໃຫຍ່ຄັ້ງສຸດທ້າຍມາເຖິງ.

“... ຈົ່ງໃຫ້ສັນຍານໄພແກ່ບ່ອນໃກ້ໆພູສີໂອນ! ຈົ່ງແລ່ນໜີໄປໃຫ້ປອດໄພ! ຢ່າສູ່ໄດ້ຊັກຊ້າ! ພະຜູ້ເປັນເຈົ້າກໍາລັງນໍາໄພພິບັດມາ ການທໍາລາຍອັນໃຫຍ່ມາແຕ່ທິດເໜືອພຸ້ນ.” ຢລມ 4:5-6

ສີໂອນ ບ່ອນທີ່ປະຕິບັດຕາມເທດສະການຕ່າງໆຂອງພະເຈົ້າ ເປັນບ່ອນລີ້ໄພ ແລະ ຄວາມພົ້ນ ທີ່ພະເຈົ້າໄດ້ຊົງສັນຍາກັບພວກເຮົາ (ອຊຢ 33:20). ຄິດສະຕະຈັກຂອງພະເຈົ້າ ສະມາຄົມເຜີຍແຜ່ຂ່າວປະເສີດທົ່ວໂລກ ເປັນຄິດສະຕະຈັກດຽວໃນໂລກ ທີ່ປະຕິບັດຕາມເທດສະການຕ່າງໆຂອງພະເຈົ້າ ຕາມຄໍາສອນຂອງພະຄໍາພີ ນັ້ນແມ່ນສີໂອນ.