Morke

Morke wng kha belai khe kirimasingcha jaga se je aro-o hóro tekto manẃi tong phuru twi thopsa phano mannani kutuk. (Luk 16:24) Jisu sa kha tumungno chini yak, yakung, eba khe mokol chwngno sumsogo khiklai khe, abo morke-o khiklaijakmani slái abono tansu-ui eba khe ekhregwi khibima se ham kugo.” (Mark 9:43) Abo tamni bwgwi hwn khe morke-o tekto manmani abo chini bwsakni bojrono tansu-ui khibimani sak samung bai su jak nai se kwrwi.

“Aro-o bórokni bwsakni yóng klai phlaiwi máng tongnai, phiya morke-o hórbo thwi phlai ya máng tongnai.” Mark 9:48

“Hór bai jotono mui-o sóm rwjak hai khlaijaknai.” Mark 9:49

Morkeni satokjakmung belai khe sak-tekto manwi tong phano, chwng chini sak-sak thwiwi se manglak. Morke-o, langmani tongthokmung srapsa jorani bagwi phano kwrwi, lenglamung jorabo kwrwi, tei mwthangjakna bagwi asamung bo kwrwi, phiya ba belai kotor sak-samung, khá khammung tei dukhu simi se tongo. Tumungno chwng kothoma kaham khna mani yagulo khá kiphil ya khe tamni bagwi chwng morke-o tháng? Chwng o ha-o achai ya swkang, chwng wng kha chuknohani suarirok se. (Job 38:4-21) Haiphano, chwng chuknoha-o sumsok khlai lai kha tei morke-o rohorjaknani dorba man kha. Aboni bagwino chwng o ha, pholano alongo achai kha, tei chwng oro srapsani bagwi tong lai-o. (Esikiel 28:13-17) Tumungno chwng o ha-o morke-o satokjaknani yakni yókna bagwi lama naituk ya hwn khe, chwng morke-o se tháng thai klai-o.

“Ang bwswk se talikha hamya borok! O gaija langnai bwsakni ano sabo phiyóknai?” Rum 7:24

Kaitor morke-o satokjaknani bagwi thángwi tongnai bororokno khairokjagwi, tei Bó Bini Sak-baithang’-no morkeni satokmungni yóknani lama phunuknani bagwi o ha-o phai kha.

“Ang . . . basijakrokno se sumsok yakar di . . . hwnwi sana phai-o.” Luk 5:32

Thwimungo tlangnai chini sumsokrokno nakarrnani bagwi tei morkeni satokjakmungni phiyókna bagwi, Kaitor Bini bahan tei thẃino, sumsok gwnang, bororokni bagwi yaphar phai kha.

“Hi’n, na di, omono chá di; Yókma Terni ruti wng kha ani bahan.’” Mathai 26:26

“ ‘Yókma Terni angur bwtwi wng kha aswk bororokni sumsok nakarna bagwi kochok rwmani ani thẃi.’ ” Mathai 26:28

Chwng swmai kwtalni Yókma Terno tẃi phuru khe, chwng sumsok nakarjakmungni hamari manno tei morkeni satokjakmungni bo phiyókjago. Teibo, chwng mol brúm brúmni langma yachagwi manno tei chuknoha-o kiphilwi thángnai.

“ ‘Ani bahan chánai borok, ani thẃi nungnai borok bo mwthangjak phlai kha, hakhe, ang bono páithakni salo mwthangwi tisanai.’ ” Johon 6:54

Haiphano, tumung chwng, “Yókma Terni bising tẃi sumsok nakarjakmung tei thẃi phlai ya langma yachak di,” hwnmani a kók tunno yachak ya hwn khe. chwng chuknoha-o sumsok khlaima rok nakarjagwi man glak, tei chwng tháng thai klaima hai kheno morkeni satokjakmung mannai.

“ ‘Ang satokjakma swkang o Yókma Terni norok bai panda chá laina belai muchungo.’ ” Luk 22:15

swmai kwtal Yókma Terno tẃi lai ja di, sumsok nakarjakna bagwi Kaitorni mari, hakhe chuknoha-o kiphilwi tháng lai anw!